1ܦܵܘܠܘܿܣ ܐܲܣܝܼܪܹܗ ܕܝܼܫܘܿܥ ܡܫܝܼܚܵܐ؛ ܘܛܝܼܡܵܬܹܐܘܿܣ ܐܵܚܘܿܢܵܐ؛ ܠܦܝܼܠܹܡܘܿܢ ܡܘܼܚܸܒܵܐ ܘܦܵܠܵܚܵܐ ܕܥܲܡܲܢ؛ 2ܘܠܵܐܦܝܵܐ ܡܘܼܚܸܒܬܲܢ؛ ܘܠܵܐܪܟܝܼܦܘܿܣ ܣܲܪܒܵܙ ܥܲܡܲܢ؛ ܘܠܥܹܕܬܵܐ ܕܓܵܘ ܒܲܝܬܘܼܟܼ؛ 3ܫܵܦܵܩܲܬ ܥܲܡܵܘܟܼܘܿܢ ܘܫܠܵܡܵܐ ܡ̣ܢ ܐܲܠܵܗܵܐ ܒܵܒܲܢ ܘܡ̣ܢ ܡܵܪܲܢ ܝܼܫܘܿܥ ܡܫܝܼܚܵܐ. 4ܫܵܟܘܿܪܹܐ ܝܘܸܢ ܠܐܲܠܵܗܵܐ ܒܟܠ ܙܲܒܼܢܵܐ؛ ܘܒܸܕܟܼܵܪܘܼܟܼ ܝܼܘܸܢ ܒܨܠܵܘܵܬܝܼ̈؛ 5ܗܵܐ ܡ̣ܢ ܕܫܡܸܥܠܝܼ ܚܘܼܒܘܼܟܼ ܘܗܲܝܡܵܢܘܼܬܵܐ ܕܐܝܼܬܼ ܠܘܼܟܼ ܠܟܸܣ ܡܵܪܲܢ ܝܼܫܘܿܥ؛ ܘܠܟܸܣ ܟܠܵܝܗܝ ܩܲܕܝܼܫܹ̈ܐ؛ 6ܕܗܵܘܝܵܐ ܫܵܪܝܼܪܘܼܬܵܐ ܕܗܲܝܡܵܢܘܼܬܘܼܟܼ ܒܸܦܠܵܚܵܐ ܒܝܕܹܥܬܵܐ ܕܟܠ ܛܵܒܼܬܵܐ ܕܐܝܼܬ ܠܵܘܟܼܘܿܢ ܒܝܼܫܘܿܥ ܡܫܝܼܚܵܐ. 7ܣܵܒܵܒ ܕܚܲܕܘܼܬܵܐ ܪܵܒܵܐ ܐܝܼܬ ܠܲܢ ܘܝܵܗ݇ܒܲܠܬܵܐ ܕܠܸܒܵܐ ܒܚܘܼܒܘܼܟܼ؛ ܕܦܸܫܠܗَܘܿܢ ܡܘܼܢܝܸܚܹܐ ܒܝܼܘܼܟܼ ܡܲܥܝܹ̈ܐ ܕܩܲܕܝܼܫܹ̈ܐ؛ ܐܵܚܘܿܢܝܼ. 8ܣܵܒܵܒ ܕܐܵܗܵܐ؛ ܐܵܦܸܢ ܕܒܸܣܬܵܝܘܼܬܵܐ ܪܵܒܵܐ ܐܝܼܬ ܠܝܼ ܒܡܫܝܼܚܵܐ ܕܦܵܩܕܝܼܢ ܗ݇ܘܵܐ ܠܘܼܟܼ ܐܵܢܝܼ ܕܝܼܢܵܐ ܘܵܓ̰ܸܒ؛ 9ܐܝܼܢܵܐ ܡܣܵܒܵܒ ܕܚܘܼܒܵܐ ܙܵܘܕܵܐ ܦܲܪܦܘܼܠܹܐ ܝܘܸܢ ܒܝܼܘܼܟܼ؛ ܐܵܢܵܐ ܕܝܼܘܸܢ ܚܲܕَ ܗܲܕܟܼܵܐ ܐܲܝܟܼ ܦܵܘܠܘܿܣ ܣܵܒܼܵܐ؛ ܘܐܵܕܝܼܵܐ ܐܘܼܦ ܐܲܣܝܼܪܵܐ ܕܝܼܫܘܿܥ ܡܫܝܼܚܵܐ؛ 10ܘܦܲܪܦܘܼܠܹܐ ܝܘܸܢ ܒܝܼܘܼܟܼ ܡܒܵܕܵܠ ܕܒܪܘܼܢܝܼ؛ ܗ̇ܝ ܕܡܘܼܠܸܕܠܝܼ ܒܝܸܣܘܼܪ̈ܝܼ؛ ܐܵܢܹܣܝܼܡܘܿܣ؛ 11ܗ̇ܘ ܕܒܚܲܕَ ܙܲܒܼܢܵܐ ܠܲܝܬ ܗ݇ܘܵܐ ܠܘܼܟܼ ܒܝܼܹܗ ܦܲܝܕܵܐ؛ ܐܝܼܢܵܐ ܐܵܕܝܼܵܐ ܐܘܼܦ ܐܸܠܘܼܟܼ ܐܘܼܦ ܐܸܠܝܼ ܡܵܪܹܐ ܦܲܝܕܵܐ ܝܠܹܗ؛ 12ܗ̇ܘ ܕܩܲܡ ܫܵܕܪܸܢܹܗ ܠܟܸܣܠܘܼܟܼܼ؛ ܒܓܵܢܹܗ؛ ܕܝܼܠܹܗ ܗܲܪ ܡܲܥܝܹ̈ܐ ܕܝܼܝܼ. 13ܗ̇ܘ ܕܒܲܥܝܸܢ ܗ݇ܘܵܐ ܕܚܵܡܸܢ ܗ݇ܘܵܐ ܠܹܗ ܠܟܸܣܠܝܼ؛ ܕܗܵܘܹܐ ܒܸܥܒܼܵܕܝܼ ܚܸܠܡܲܬ ܡ̣ܢ ܓܹܒܵܐ ܕܝܼܘܼܟܼ ܒܝܸܣܘܼܪܹ̈ܐ ܕܐܹܘܵܢܓܵܠܝܼܘܿܢ؛ 14ܐܝܼܢܵܐ ܕܠܵܐ ܪܵܐܝܝܼ ܕܝܼܘܼܟܼ ܠܵܐ ܒܣܸܡܠܵܐ ܠܝܼ ܡܸܢܕܝܼ ܠܸܥܒܼܵܕܵܐ؛ ܕܛܵܒܼܬܘܼܟܼ ܠܵܐ ܗܵܘܝܵܐ ܐܲܝܟܼ ܕܒܚܲܝܠܵܐ؛ ܐܸܠܵܐ ܒܪܸܙܵܝܘܼܟܼ. 15ܐܝܼܢܵܐ ܩܵܘܡܵܐ ܐܘܼܦ ܣܵܒܵܒ ܕܐܵܗܵܐ ܫܘܼܢܹܠܹܐ (ܡܟܸܣܠܘܼܟܼܼ) ܚܕܵܐ ܣܵܥܲܬ؛ ܕܠܥܵܠܲܡ ܕܵܒܼܩܸܬ ܠܹܗ؛ 16ܡܐܵܕܝܼܵܐ ܠܵܐ ܐܲܝܟܼ ܪܹܓܵܐ؛ ܐܸܠܵܐ ܙܵܘܕܵܐ ܡ̣ܢ ܪܹܓܵܐ؛ ܐܵܚܘܿܢܵܐ ܡܘܼܚܸܒܵܐ ܪܵܒܵܐ؛ ܐܸܠܵܐܟܹܐ ܕܝܼܝܼ؛ ܘܟܡܵܐ ܙܵܘܕܵܐ ܕܝܼܘܼܟܼ؛ ܐܘܼܦ ܒܒܸܣܪܵܐ ܐܘܼܦ ܒܡܵܪܲܢ. 17ܐܸܢ ܗܲܕܟܼܵܐ ܫܵܪܝܼܟܵܐ ܕܝܼܝܼ ܝܘܸܬ؛ ܩܵܒܸܠ ܠܹܗ ܐܲܝܟܼ ܕܐܸܠܝܼ. 18ܐܸܢ ܡܸܢܕܝܼ ܢܵܐܗܲܩ ܥܒܼܸܕܠܹܗ ܒܝܼܘܼܟܼ؛ ܝܲܢ ܕܵܝܢܵܢܵܐ ܝܠܹܗ؛ ܐܵܗܵܐ ܥܲܠܝܼ ܚܲܫܒܸܢ؛ 19ܐܵܢܵܐ ܦܵܘܠܘܿܣ ܟܬܸܒܼܠܝܼ ܒܐܝܼܕܝܼ̈؛ ܐܵܢܵܐ ܒܸܬ ܦܲܪܥܸܢ؛ ܕܠܵܐ ܐܵܡܪܸܢܘܼܟܼ ܕܐܘܼܦ ܓܵܢܘܼܟܼ ܕܵܝܢܵܢܵܐ ܝܘܸܬ ܐܸܠܝܼ. 20ܗܹܐ؛ ܐܵܚܘܿܢܝܼ؛ ܐܵܢܵܐ ܦܵܝܫܸܢ ܡܘܼܢܝܸܚܵܐ ܒܝܼܘܼܟܼ ܒܡܵܪܲܢ. ܡܲܢܝܸܚ ܡܲܥܝܝܼ̈ ܒܡܵܪܝܵܐ. 21ܣܵܒܵܒ ܚܵܬܸܪܓ̰ܲܡܥ ܝܼܘܸܢ ܕܟܹܐ ܫܲܡܥܸܬ ܠܝܼ ܟܬܸܒܼܠܝܼ ܐܸܠܘܼܟܼܼ؛ ܟܲܕ ܒܝܼܕܲܥܝܵܐ ܕܙܵܘܕܵܐ ܡ̣ܢ ܡܸܢܕܝܼ ܕܐܵܡܪܸܢ ܟܹܐ ܥܵܒܼܕܸܬ. 22ܐܝܼܢܵܐ ܒܚܕܵܐ ܓܵܗܵܐ ܐܘܼܦ ܗܵܕܹܪ ܐܸܠܝܼ ܕܘܼܟܬܵܐ ܕܫܪܵܝܬܵܐ؛ ܣܵܒܵܒ ܒܗܹܒܼܝܼ ܝܘܸܢ ܕܒܨܠܵܘܵܬܵܘ̈ܟܼܘܿܢ ܒܸܬ ܦܵܝܫܸܢ ܝܘܼܗ݇ܒܼܵܐ ܐܸܠܵܘܟܼܘܿܢ. 23ܒܝܼܵܗ݇ܒܼܵܐ ܝܠܹܗ ܫܠܵܡܵܐ ܐܸܠܘܼܟܼ ܐܲܦܵܦܪܵܐ؛ ܐܲܣܝܼܪܵܐ ܕܥܲܡܝܼ ܒܝܼܫܘܿܥ ܡܫܝܼܚܵܐ؛ 24ܘܡܵܪܩܘܿܣ؛ ܘܐܵܪܸܣܛܲܪܟ݁ܘܿܣ؛ ܘܕܐܹܡܵܐ؛ ܘܠܘܼܩܵܐ؛ ܗܲܝܸܪ̈ܵܢܝܼ. 25ܫܵܦܵܩܲܬ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܪܘܼܚܵܘܟܼܘܿܢ؛ ܐܵܡܹܝܢ.